年輕人市場最緊要夠型

要睇一間公司的前景，除咗要睇未來會有甚麼產品，睇在年輕人市場佔有率亦好重要。特別好似報章、雜誌呢類依賴慣性收視的產品，如果年輕人市場做得好，前景都唔會差得去邊。家陣媒介策劃都講究讀者Profile，如果讀者多而不年輕，就係雞肋，因為年輕人先至係廣告商最想接觸的一群。

電腦市場方面，以往蘋果電腦話雖在教育市場佔領導地位，不過，學校用佢不代表佔領年輕人市場，因為細路返屋企打機，唔係對住PS2就係對住Windows PC，Mac不嬲佔領唔到年輕人的書房，所以過往帶住蘋果渡過難關的，是一班有番一定宗教熱誠的Mac擁躉。

不過似乎時勢有些改變，根據最近發表一項研究報告，今年有四成半普林斯頓大學的學生，買新機時選擇為Mac。以一間大學千二名學生統計來說，有一成三打算買部Mac。在筆記簿電腦市場，兩成一的大學生選擇咗Mac。而學生選擇Mac的理由，好多係因為佢「型」。正因為外型問題，所以Mac在佔有率上的增長，比較立竿見影。當然，iPod係令到年輕人認為Mac好型的原因，所以連iMac依家都搞到似加大碼iPod。另有樣殺著，你唔可以唔服Steve Jobs，就係因為依家Mac係dual boot，既可用Mac，又可用Windows，要型唔駛犧牲打機樂趣，買一得二就係人都想，呢樣特點直接令蘋果電腦重獲生機。

只要iPod同埋Mac繼續型落去，蘋果機的前景可以繼續睇好，不過蘋果機前景好又有乜投資機會？
1. 由於Mac友佔年輕人比例越來越多，如果依家有公司堅持開發Mac遊戲，有機在處女地突圍而出，而長期的Mac Game堅持者，據禤中怡所知有Electronic Arts同出Warcraft的Blizzard Entertainments。
2. 如果有間小公司，推出設計上令人驚艷的筆記簿電腦，而又有上市的話，好快呢間小公司或Design House便會成為大公司的收購對象，因為未來要維持增長，電腦外型絕對唔可以呆落去。此若有Smart商人想投資電腦業，專注設計外型一流的筆記簿電腦，好可能大有前途，好過投放大量心血研究點樣做底板。底板未必有錢搵，設計至係高增值。
(11月3日刊於《am730》)