滙豐控股的弱點

林少陽兄昨日表示禢中怡看扁滙豐控股(005)，其實我並無此意，滙控是我心目中的最佳上市公司。不過，只是看到近日愛股股價莫名地、急速地飛升而感到意外罷了。

不過，就是頂尖高手，也有弱點，滙控雖然在眾多銀行業務中，皆有無懈可擊的表現，不過每當提到投資銀行業務(Investment Banking)，好像就只能在亞洲區稍見成績。有投資銀行家好友笑言，多次滙控中人向他招手，但好友也拒絕盛情，並明言，與大摩、花旗、高盛等比較，滙控還有「很大進步空間」。

講起獅子銀行，外界盛讚的，還是其零售銀行業務，相信世界上都算首屈一指，在工商業務方面，成績都好好。但係，滙控在投資銀行業務(Investment Banking )，就唔夠花旗(Citigroup)、大摩(Morgan Stanley)、高盛(Goldman Sachs)等大行表現出眾。在亞洲區，仲有人知滙控識做投資銀行業務，但去到歐洲同北美，人哋會問你，乜HSBC唔係只做零售銀行的麼？

禢中怡唔會將滙控同大摩、高盛比，因為呢啲大行專注於Investment Banking，咁樣比較唔多公平，而業務上大家差唔多樣的花旗集團，就可能比較有參考價值，花旗過往掃晒Euromoney、The Asset Magazine雜誌的獎項，滙控呢瓣已經好難有得揮。

先講牌面，花旗銀行集團，在Investment Banking業務上做咗好多功夫，佢哋做Investment Banking有兩間公司，一間係掛Citigroup的大號，一間叫Smith Barney，而Smith Barney本身在九十年代又吞併了Salomon Brothers，這兩個名牌，都喺行內佔領導地位，換言之，花旗銀行明顯有品牌優勢，在講求名氣嘅投資銀行業界上，HSBC無疑是較為失色的，另一方面，滙控係一間傳統英式紳士文化主導的公司，一向都唔多沾手呢類業務，管理層個個都出身自一向講求穩陣的零售銀行業務，包括John Bond、Stephen K.Green、Keith Whitson 、William Purvas、David Eldon和Michael Samdberg等等，香港獲多利以前就叫有啲名，但真係收購一些比較有名的Investment Bank或Private Bank，近期都只係收購咗美國的Republic Bank，根本上，滙控的宗旨係求穩陣多於求大賺的公司。

如果想銳意發展investment banking 業務，一係就收購好的公司，一係就高薪挖角，滙控係有大把錢去挖角，聽聞行內風聲他們亦有向花旗、高盛、瑞銀等挖人走，問題係，滙控文化容納唔到有料到的investment banker。

2004年，HSBC高薪由法興(Societe Generale)挖嚟的Peter Lewis，搵佢做全球股票市場的主管，點知做得三個月，就傳出因斷背疑雲而請佢走，仲搞到Peter Lewis要告HSBC。在投資銀行界，三尖八角的人好多，滙控連斷背賓架都容唔落，點同花旗砌呀。照計HSBC擁有強大網絡，只要文化上唔好咁保守，係有得同花旗在投資銀行業務一較高下的，問題係如果文化照舊咁保守，我睇花旗銀行唔會當HSBC係威脅。

美軍的天文台

說是五月份進入南海最猛烈的颱風珍珠，終於都只是掠過香港，除咗多咗啲狂風大雨，未有造成太大的影響。但大家有否留意到每一次颱風打到嚟香港，天文台都要面對好大的壓力，點解？因為颱風走勢預測，同埋幾時打八號風球，已經係市民評定天文台可信度的指標。而睇番近幾年，市民似乎唔係好信天文台，好多人一打風就走入一位前天文台科學主任開的「香港地下天文台」的討論區，睇班業餘氣象迷的天氣預測，搞到次次打風期間都要只限會員進入，由此可見時下市民對天文台的信任度有幾高。

而除咗呢班固定地監察天文台的專業人士，現時世界各地的氣象機關都將預測同資料上網，隸屬美軍的聯合颱風預報中心（Joint Typhoon Warning Center，簡稱JTWC）仲會預報各地有可能發展成颱風的低氣壓，而佢哋每一次預報颱風動向，都會附有一份預報理由解說，講明由邊個、根據甚麼資料作出有關預報，就算有失誤，公眾都可以知點解。好多睇慣聯颱預報的人，一早已經準備晒牛皮膠紙，罐頭等等，唔會等個風打到嚟至同你慢慢傾。但香港天文台除咗路徑預報圖，真係好少學人哋聯颱咁，晨早提醒你颱風動向，或者在預報裡面提供埋理由，俾公眾有所判斷。

揀行業投資好過估大市上落

昨日港股再一次證明沒有人有水晶球。在一片看淡下，恒指反彈222點，收報16,616點。美元升勢只是曇花一現又再回落，無疑是對港股的強心針。

正所謂有智慧不如趁勢，選擇行業投資，實在是好過每日估大市上落。即使大市上升，你買的股票不一定升。現時焦點當然是金融業，中港亦然。中國的經濟增長強勁，但由於改革仍在進行中，金融業仍然存在不少問題。這亦是在一系列重組完成前，人民幣不可自由兌換的原因，三年相信是十分樂觀的估計。現時M2增長已連續幾個月遠高於人民銀行的全年預測，而且亦遠高於貸款增長。這產生了不少問題，例如經濟是否過熱及壞帳問題會否因日後加息亦急速轉壞(當然國內權威人士另有看法)。

有危亦必有機，這亦是股市好玩的地方。今日的焦點則是中銀(3398)上市，雖然上市價是2.5元至3元之間，大家亦明白實際上會以上限定價。以06年帳面值計，估值大約為2.1倍，參考交行(3328)以及建行(939)的定價約2.5倍，仍然有一定吸引力。不過，以質素計，仍然是交行以及建行為佳，這點可從股東回報率以及壞帳比率看到。但在這個大時代，上市價不太高已等於十分吸引，又有幾多個人會看完幾百頁的招股書才做決定?不少人又會問，中銀上市中銀香港(2388)的定位又會如何? 其實兩者的業務沒有重疊，子公司的吸引力亦不比母公司低。中銀有差不多三成資產是來自香港業務，所佔盈利比重亦不低。經過一系列的重組，中銀香港現時的表現其實不錯。股東回報率不低，息差亦有改善，成本對收入比率亦是行內最低的幾間之一。派息亦高，早前除淨後，現時的息率亦有5%以上。其股價對帳面值亦不過是2.1倍。

(18-05-06 刊於《am730》)