香港公司出品的哈蘇相機

林相機（採用面積更大菲林、通常用於拍攝人像的專業用相機）上，同瑞典哈蘇（Hasselblad）爭一日之長短的日本品牌Mamiya宣布投降，相機業務賣俾一間IT公司算數，好多Mamiya迷都好失望，是否意味專業級數嘅相機市場以後只有俾瑞典人玩晒呢 ？答案並非這樣簡單，正確講係由一間香港公司玩晒。你無睇錯，確係香港公司將會玩晒120菲林相機嘅市場，因為瑞典哈蘇嘅生產商Victor Hasselblad AB嘅大股東，就係一間叫石利洛（Shriro）的香港家族企業，而呢間公司低調到嚇死人。如果無人提起，真係無乜香港人知哈蘇查實已經係香港公司。

石利洛本來係一間中國公司，有一個英國人，九十幾年前，在冰天雪地嘅哈爾濱，開始佢嘅皮毛貿易生意，經歷過抗日戰爭、國共內戰等中國歷史大事後，石利洛洋行學上海富豪們避共產黨咁，將公司南遷到香港，落地生根。不過香港天氣咁熱，做皮毛生意好難做，所以佢哋開始代理相機，以及一啲專業嘅測量同機電儀器。一般人眼中對石利洛嘅印象，只是一間洋行，就係咁多。2002年，石利洛同哈蘇做咗代理四十幾年後，宣布收購哈蘇於斯德哥爾摩證券交易所掛牌嘅股票，成為咗哈蘇大股東，咁忽然間，一間英國人創辦，主要管理層有唔少華人的老牌香港企業，就成為世界最高檔相機的生產商。石利洛收購哈蘇後，繼續佢嘅潛水作風，無在香港高調宣揚，連在哈蘇的網頁，石利洛連個招牌都無顯示。在2003年，石利洛將丹麥數碼相機技術先驅Imacon收購過嚟，注入哈蘇，令哈蘇忽然數碼化。

石利洛咁成功，又可以低調成咁，確係香港公司一大異數，仲要呢間公司做到咁出名，都係家族生意無上市。唔知石利洛嘅後人，可唔可以過番一兩招俾香港班慌死人哋唔知自己有錢嘅富家子弟，點樣低調地發大財？

星洲大選的啟示

新加坡上個禮拜六大選投完票，當日晚上已經有結果，當然大部分國會議席都在人民行動黨手中，照樣是84席裡面有82席。不過，李顯龍在其參選的選區，成績真係麻麻，得六成幾選票。點解有六成票都只係麻麻地？因為李顯龍以及他5名拍檔的對手，查實只係一班30歲出頭的無名小卒。照常理計算，總理級人馬的選區，反對派想贏係發夢，好似李顯龍父親李光耀個選區丹絨巴葛，從來無人敢挑戰。不過，反對派明知李顯龍贏，就將計就計，本身都係民選國會議員的工人黨秘書長劉程強，派了被人民行動黨稱為「自殺六子」(Suicide 6)的候選人，此六子的特色是除了哥巴．克里斯南這位馬來裔候選人外，其餘候選人30歲不到，最年輕者僅24歲，可說全部是新人。

呢招仲高明過孔明借箭。挑戰總理的候選人，本身已經係一個爭取曝光的賣點，工人黨選前的如意算盤是，一旦好多人唔滿意人民行動黨，令李顯龍得票率奇低，咁工人黨的新秀不單得到寶貴的經驗，更可獲取知名度，日後再出來選舉就好著數。恰巧，又好似有東風幫工人黨咁，新加坡好多人唔滿意國內物價飛漲。原本人民行動黨口出狂言話得到85%選票，結果呢自殺六子剝掉執政黨棚牙，仲搞到馬來西亞好多地下賭盤輸了唔少錢。新加坡工人黨派人搞「自殺」，借李顯龍隻手培訓咗6名新人，香港政壇卻仍然是「老人」當道，好像沒甚機會予新人出位。與新加坡比較，禢中怡終於明白點解班民主黨少壯派當年要出走了。

(09-05-06 刊於《am730》)