任志剛的人工值唔值 ？

中環的賓架們，成日都質疑任志剛值唔值咁高人工。當然，任志剛成日都搬出好多理由，用來支持他領取高薪。不過，禢中怡諗咁耐，有3個理由，去質疑點解任先生，點解可以支咁高的薪水。先比較一吓金管局裡面，另一位好把炮的副總裁韋柏康（William Ryback, JP）的薪水，韋柏康03年入金管局做副總裁前，為美國聯儲局銀行監理局的高級助理總裁，又做過美洲銀行監管機構的代表，兼且又做過聯儲局在巴塞爾委員會的代表，其猛料程度，分分鐘坐埋任志剛個位都得。

以前韋柏康的人工係高過格林斯潘，以韋生這級數的人才，收500萬港幣年薪當然係抵，但咁樣睇，唔通任志剛比在世界金融市場可以呼風喚雨的格林斯潘仲要掂?

任志剛唔係只係做銀行監管，任生仲幫全香港人打理外匯基金，作為全港最大基金的經理，一萬億港紙外匯儲備有3.1%的回報，咁997.5萬人工值得啩。但你睇番新加坡最大國有企業淡馬錫控股(Temasek Holdings)，人地負責4,000億港元的投資，去年回報率大約13%，雖然其總裁、李顯龍之妻何晶的薪水並無公開，但淡馬錫控股三千幾名員工，管理的公司，間間都好似新加坡電信、星展銀行咁鬼大間，就算她的人工同任志剛一樣，都好明顯抵過任志剛。更重要的一點係，香港行聯繫匯率，利率政策又係被美國綁死，匯率基本上無乜變動，任志剛又唔使出去sell客，又唔好似李顯龍老婆何晶咁，周遊列國出去講數玩收購，究竟佢有乜咁忙，要收成八百萬港紙人工，呢個價真係令人好懷疑。禢中怡收到張報稅單，諗起要支薪俾任白頭，真係越諗越唔抵。

淡馬錫控股係乜你要知

講開淡馬錫控股，其實香港不少事，都與該公司息息相關。淡馬錫控股，以及新加坡政府投資公司(GIC Singapore)，都係新加坡政府屬下的投資公司，只不過好多對外的收購，就由淡馬錫控股出面。在香港，只要你幫襯領匯的商場，已經同淡馬錫打緊交道，因為領匯其中一個重要股東嘉德置地(CapitaLand)，就係淡馬錫控股的公司。近排出高價向和黃(013)買港口業務的新加坡港務局(Port of Singapore Authority)，都係淡馬錫控股的全資附屬公司。仲有，香港有唔少客戶的星展銀行，淡馬錫控股都手持28%股權。如果你屋企有印傭，好多印傭在印尼的往來銀行，都係淡馬錫控股擁有。正由於淡馬錫控股係代表新加坡政府向外面收購，而淡馬錫有興趣的，都係港口、傳媒、銀行、通訊等業務，所以淡馬錫控股成日出外面收購都惹出政治風波。好似淡馬錫擁有的新電信(Singtel)收購當年香港電訊(Cable & Wireless HKT)，搞出政治疑慮，最後要李澤楷借成身債嚟蛇吞象。而淡馬錫收購泰國前總理他信的家族企業，仲搞到泰國都出現反新加坡浪潮。
淡馬錫控股旗下企業，好多都係名牌子，照睇應該回報唔錯。淡馬錫唔係上市公司，佢係用新加坡納稅人的錢投資，所以在2003年之前，財務情況好鬼神秘。而去年10月公布業績顯示，淡馬錫在過去一年的投資回報係12%，投資組合達到1,000億坡幣，亦即約4,000億港元。

香港外匯基金有成萬億港紙，但投資表現連港幣定期都不如，好似何晶的人工仲無任志剛咁高，好多新加坡人對政聯公司(同政府有關的公司)要員人工高牙痛咁聲，成日俾反對黨質。俾著我，肯定先質咗任志剛份人工先。

宏利市盈率吸引的原因

單從經濟數據看，現時美元的走勢仍然似是上落市。雖然上月非農業職位增長較市場預期為低，但平均工資則錄得5年最高增長。因此，是否需要再加息亦有其原因。不過，雖然聯儲局主席已指出市場早前誤解其言論，但美元輕微反彈後又再下滑。歐洲受惠區內最大經濟體系德國3月失業率大幅下跌，歐元最新已報1.272美元。雖然美元利率在06年仍然上升，但歐元由年初至今亦已上升了接近8%。持有港元的大家，在匯率上其實已損失了不少，準備去旅行或讀書的感受必更深刻。匯率的影響，亦是間接導致國企受投資者追捧的原因。試想想，人民幣持續升值的話，轉換成港元則可賺取額外的純利增幅。如果預期升值不只是2%至3%的話，升幅自然更加可觀。短期股價升跌，很大程度是取決於投資者的預期。當然，長線看的仍然是公司的業績，剛剛宣布漂亮業績的宏利(945)亦是一例。

宏利在99年上市，現時已升了5倍。雖然股價上升不少，但公司卻有業績支持。其純利平均每年亦可保持雙位數字增長，剛剛宣布06年第一季純利亦上升19%。股東回報率亦改善至16.3%，已較為接近收購恆康前的水平。以匯率計，加元由4月至今亦上升了超過6%，以港元計宏利的盈利亦變相上升，這亦是其市盈率可以保持在吸引水平的原因之一。

另一些受惠外幣上升的公司包括思捷(330)以及渣打(2888)等等。雖然最近的業績令人失望，但前者同樣受惠於歐元上升。後者在收購韓國第一銀行後，亦打算收購LG的信用卡業務，這有助拓展其消費信貸業務。單以匯率計，亞洲貨幣上升對渣打亦有利，而油價上升亦有利中東市場的盈利表現。

有趣圖片：阿叔鬧人？

如你在公共交通工具上，遇到有位阿叔大聲講電話，你輕輕拍拍他，同佢講不如細聲一點，但換來對方大罵，仲問候埋你至親，又唔俾你走，你會點？動粗定係報警？圖中是一段最近網上極為流行的短片的截圖，由於位阿叔把聲同出名講波位阿叔極為相似(個樣就差好遠)，引起網上熱烈討論，因為坐在巴士上的少年遇到這種情況時，馴如羔羊，港燦就話這應是見工面試問題。要睇片，上近期大熱的video網站youtube.com，用阿叔個名(不要連姓氏)search啦！

(08-05-06 刊於《am730》