NTT買關島電訊商搞邊科？

3月20日，日本流動電話界巨無霸NTT DoCoMo宣布，以約7,200萬美元買入關島流動電話公司Guam Cellular以及Guam Wireless全部股權。NTT DoCoMo買入關島呢兩間電話公司後，就會將兩者合併，仲會在關島推出W-CDMA的3G服務。

關島在軍事上好重要係人都知，美國海軍空軍在亞洲的主力，都放在關島。但關島人口僅16萬多，咁NTT DoCoMo為何還要買兩間流動電話公司，推出同美國本土CDMA2000標準不兼容的W-CDMA服務，難道駐在當地的美兵，會用返到美國本土會變廢物的電話？

NTT DoCoMo當然唔係嫌錢多，而是為日本人服務。因為日本人喜愛赴關島、夏威夷這等美屬太平洋島嶼度假和退休，貪它們有陽光與海灘，又近日本，兼且在美國治下，衛生又安全，又有唔少日軍當年的戰爭遺跡。每年關島都會接待成百幾萬遊客，當中有超過一半係嚟自日本。以前日本人去關島，要專登租部CDMA2000或者GSM1900電話嚟用，除非你用開新款3G機。NTT DoCoMo入主關島兩間電訊公司後，以後去關島玩就唔使換機，你話幾爽呢？更爽係，NTT DoCoMo還可再賺一筆額外之財，據講日本旅客就算係用緊日本Vodafone(Vodafone已經打算賣俾Softbank)的3G服務，去到關島都一樣要俾NTT DoCoMo漫遊電話費，大家諗吓，漫遊電話費幾昂貴至得㗎。單係做日本遊客生意，已值番呢個價。唔怪得NTT DoCoMo話要在呢個得十幾萬人口的地方，建個3G網。正如和記都諗住在澳門投個3G牌玩吓，更在澳門測試緊網絡，千萬唔好睇少呢類遊客多、本地人少的電訊市場，漫遊服務至係肥豬肉所在。

TOM仔脫離收買佬之列

TOM集團(2383)昨公布業績，較去年同期跌66%至2.6億元。不過新管理層明言若不計04年分拆TOM在線(8282)的非經常性收益，亦不以新會計準則的情況下，實際錄得純利1.57億元，較04年1.29億元升21.7%。今次管理層滿懷開心的表示，TOM集團已離開「靠收購」錄得盈利的老路，轉至發展自身業務賺錢了。

過去TOM集團在王兟領導下不斷精簡架構與東征西討，論最成功的是他將TOM在線分拆上市，錄得7.3億元的非經常性溢利。雖然tom在線的小股東初期面對股價的壓力，但若堅持信念的話，現時已重返招股價之上。

說回王兟的新碼頭威利國際(273)，讀者應細心留意該股買盤似乎相當積極，與王兟入股前的莊友衡王國實屬天淵之別，王兟早前曾透露已於內地與日本進行路演，為他的「新歡」曲靖大為焦化而奔波，昨天更停牌，表示正從事需要公布的大型交易，看來他的事業，將會更進一步。

(22-03-06 刊於《am730》)