華爾街大老虎甩身？

最近有一位久違了的名字，又在報紙上出現，呢位仁兄在科網股泡沫膨脹到全世界傻晒嗰陣好有名，佢係瑞士信貸第一波士頓(Suisse Credit First Boston)前科網股部門主管奎松特(Frank Quattrone)(圖)。

呢位奎松特以前有幾威？他曾經協助Amazon.com以及Netscape(後來被AOL食咗)上市，年薪超過1億美金，佢亦係自垃圾債券大王米爾根(Michael Milken)後，入冊的最大粒賓架，可以話係華爾街大老虎。

在幾年前，奎松特在當局查緊佢一宗關於科技股IPO分配股份案期間，向下屬發出E-Mail，叫班下屬清理電腦裡面的文件，結果被當局告佢妨礙大陪審團，以及監管機構調查。在2004年被判入獄18個月，不過，他於上訴期間獲准保釋，因此，奎松特嚴格嚟講，未真係食過皇家飯。

最近紐約上訴法院裁定，當初主審奎松特案的法官，錯誤引導陪審員，因此，單案發還重審，仲要另外搵個新的法官去審，因為話原本負責單案的法官，對奎松特可能有偏見。查實近排美國司法部都幾黑仔，最近幾單諗住打華爾街大老虎的官司，都被對方打甩咗，最高法院之後要求將執咗笠的安達臣會計師行（Arthur Andersen，中環人叫做AA）單案重審，結果因為AA執咗，美國司法部只好放棄再打單案。HealthSouth創辦人Richard Scrushy呃成廿七億美元單案，又俾對方打甩埋。華爾街老虎，你估咁易打咩。

不過，呢次奎松特未必有咁好彩，雖然單案發還重審，但上訴庭個法官在判詞度話，重審之後，根據現時的證據，夠料告入佢有突，只不過依家有人技術出錯咁解。奎松特似乎霉氣未消，不過，一單官司玩十年八年好平常，賴昌星拖到依家都未捨得返大陸。負責奎松特單案的檢控官，有兩個都已經唔玩去咗私人執業搵真銀，想睇奎松特食皇家飯，等打到最高法院，真係等到頸都長。

微軟遲出新版Windows累街坊

依家個市，大笨象郁下手腳，都可能隨時累及其他股份。好似Microsoft禮拜二話推遲Windows Vista推出時間，講到明趕唔及今年12月感恩節同聖誕節購物黃金旺季。唔單只微軟股價受害，零售股都因為Windows遲出，累及聖誕家庭電腦銷售，股價表現認真多得佢唔少。微軟股價在消息傳出後跌咗3%，報26.95美金。連鎖店Best Buy，跌0.44美元，報55.06美元，Circuit City就跌0.34美元，報24.37美元。

依家大家用緊的Windows XP已經出咗接近五年，你同人哋蘋果Mac機相比，Steve Jobs已經由10.2出到10.4，連CPU都換埋Intel，仲話分分鐘出緊10.5，PC友對新Windows仍然得個望字，Windows XP已經有些out，再遲出Windows就實有人去Steve Jobs度投誠。

更大鑊的是與Microsoft競爭的軟件，不斷有新花款出。好似瀏覽器咁，Mozilla Firefox一早有RSS支援好耐世紀，成為博客熱門的工具。Microsoft雖然在MSN Spaces博客度有RSS，但搞笑的是，大家用緊的IE 6係無內置RSS，一係做白老鼠下載試用緊的IE 7，一係就用Firefox，睇MSN上博客用Firefox，真係型到震。Firefox試緊2.0版，配合IE 7的Windows Vista仲係連影都無。

Bill Gates肯定依家累親街坊，不過又唔好怪佢老人家，以往Windows bug又多，漏洞一大堆，結果養肥咗類似Symantec（出Norton Utilites間公司）的電腦保安技術公司。又睇吓今次新的Windows Vista保安會有幾大改善，令大家用Windows好似用Mac嗰陣咁，連防毒軟件都可以慳番。

不過，若Vista真的改善保安程度，咁Norton之類的程式就無用武之地，Symantec等公司的前景，真係取決於Bill Gates班手下生唔生性。如果繼續病毒多多，Symantec等公司梗係前景穩定，但如果保安大為穩陣，就輪到病毒軟件公司股東要諗點轉型至搵到銀。

港股造好尾市升幅擴大

港股昨日造好，恒指重上15,700水平，尾市恒指升幅擴大。恆指全日收報15,771，升128點，成交276億元。國企指數收報6,562，升83點或1.3％。新股市場持續活躍，中國建材(3323)昨日新上市，報3.325元，較招股價2.75元升21％。另外，湖南有色(2626)因反應熱烈，亦提前一天截止配售。

除重磅藍籌長和系公布業績外，中國集裝箱租賃及碼頭營運商─中遠太平洋(1199) 亦公佈2005年度業績。受來自中集集團盈利貢獻及出售蛇口碼頭權益的特殊收益帶動，中遠太平洋公布截至去年底的年度凈利為3.3494億美元，2004年度為2.066億美元，同比增長62.1%。但仍略低於市場預期之3.45億美元。期內中遠太平洋營業額由上年度的2.753億美元升至2.9565億美元，公司擬派發每股0.278港元的末期股息，2004年度同期為0.246港元。根據中國集裝箱工業協會的統計，到2007年行業產能將可能達到580萬TＥＵ，嚴重過剩的產能已初步形成，並為集團帶來一定壓力。

雖然今年預計集裝箱將過剩，但貿易量能保持，可留意招商局國際(144)。年內中遠太平洋以6.1億港元將所持中國蛇口港17.5%權益售予招商局國際。

而招商局國際上半年已完成上海港務(集團)的注資手續，將於下半年分享它的利潤貢獻。加上，招商局國際母公司─招商集團不排除會將現有的碼頭進行擴建或尋找新的項目，再注入招商局國際。

招商局國際持有22％股權之深圳赤灣港航股份(深Ａ:000022）(深Ｂ:200022）剛公布2005年實現淨利潤5.91億元人民幣，同比上升10.4%。預計後市可看高一線。

(24-03-06 刊於《am730》)