Mac機識行Windows 有好戲睇

今年一月，Steve Jobs陸續推出咗一批用緊Intel x86 CPU，亦即係同大家枱面部PC一樣的新一代Mac機。呢鋪Steve Jobs咁做已經搞到江湖風起雲湧，有俄國黑客自告奮勇，破解Mac OS X，搞到好多PC都行到Mac，突然多咗好多異類Mac友。

亦都有人想在新Mac機行Windows，話雖Mac本來有由Microsoft出品嘅Virtual PC，可以在Mac行Windows，但速度慢又多限制，依家PC同Mac都係用同一款CPU，仲唔諗下Mac度點用Windows XP boot機。有人出咗成1.2萬美元，大概成九萬幾港元，徵求用Windows XP boot機的方法，正所謂重賞之下，必有勇夫，梗係有人度橋去做，不過個方法超麻煩，需要有番咁上下功夫至做到。正當唔少人用好麻煩的方法在新款Mac機度用Windows XP boot機之際，蘋果就話徇眾要求，推出免費的Boot Camp軟件，裝咗佢，就可以自由自在地在Mac同Windows之間兩邊走。買部iMac，同時有齊Mac機同PC功能，大件夾抵食。

Steve Jobs呢鋪都算絕喇，禢中怡好多朋友，諗住買Mac機，貪佢靚仔，心裡面十五十六，因為怕打唔到機，又怕軟件唔夾，結果忍痛放棄咗。依家有Boot Camp，無咗軟件唔夾呢個問題，仲唔飛撲去買。

華爾街班芬佬同賓架，好明顯欣賞呢隻軟件為蘋果帶嚟嘅搵銀能力，在宣布推出後3小時裡，蘋果股價已經升咗7.3%，去到65.64美元，比上日收市升咗四個半美元，而且睇落隨時有排升。睇嚟瑞銀華寶定個目標價95美元，並唔難辦到。不過Dell同HP的股價好似無乜動靜，可能大家仲未睇到實際上，Steve Jobs會帶嚟乜威脅。不過，手持中國聯想(992)的朋友，就要睇住Steve Jobs下步，會唔會威脅到新買返嚟無耐的IBM PC部門。

港股是否已陷入瘋狂？

恒指16,000點三頂不破，將會大幅下滑? 加上秋官效應，可能不少投資者亦認為恒指將會調整。其實正如禢中怡昨天指出，現時恒指仍然便宜，主要因為滙控(005)以及中移動(941)的估值吸引。早前美元強勢，延遲了恒指的升幅。最近美元轉弱，有助加速恒指的上升速度。昨日港股上升311點，成交擴大至457億元。不要忘記，除了超大(682)配股外，昨日並沒有任何重大的配售以及新股上市，因此實際成交仍然有接近450億元，難怪港交所(388)再創新高。現時股市是否瘋狂? 個別行業有點泡沫味道，但整體而言暫時仍算健康。早前說過香港的銀行股會繼續閃亮，東亞(023)亦升穿多年高位，至31.4元。現價大約代表17倍06年市盈率，可能不算十分便宜。不過考慮到國內的增長強勁，淨利息收入在去年下半年已開始回升，未來的增長仍然會不錯。當然，這需視乎海外擴展的速度。一般而言，國內以及澳門除了貸款增長較理想外，息差亦較佳。香港銀行水浸，競爭難免較為激烈。

最近凡有「中」字頭的亦升得唔清唔楚。中化香港(297)大升11.65%收報2.875元，成交2.49億元。公司將會在本月10日公布業績，近期股價的走向，或多或少暗示其業績良好。巧合地，德意志首次將中化香港納入評級的目標價為3.15元，現價購入的話尚有10.5%微利。

(07-04-06 刊於《am730》)